როგორ შეიძლება კალამი გახდეს ინვესტიცია?
ალბათ ბევრს გააკვირვებს, რომ ზოგიერთი მწარმოებლის კალამი ნამდვილად შეიძლება ინვესტიციად იქცეს. მაგალითისთვის საკმარისია გავიხსენოთ Montblanc-ის Writers Edition-ის სერია და მასში ერთ-ერთი ყველაზე მოთხოვნადი მოდელი "Ernest Hemingway". მისი საწყისი, ოფიციალური საცალო ფასი $650 იყო, დღეს კი მისი ღირებულება მეორად მდგომარეობაში (ყუთისა და დოკუმენტების გარეშე) 2000–3000 აშშ დოლარის დიაპაზონში მოძრაობს. ახალ, არასოდეს გამოყენებულ (NOS) მდგომარეობაში კი დაახლოებით $4000 ღირს.
Montblanc-ის ეს მოდელი არც პირველი და უკანასკნელია, რომელმაც ასეთი ფასობრივი მატება განიცადა. ანალოგიურად, აღსანიშნავია Aurora-ს შეზღუდული გამოშვება "Da Vinci" - უნიკალური დიზაინი, უმაღლესი ხარისხის მასალები და მაღალი დონის ოსტატური შესრულება. ტირაჟის სრულად ამოწურვიდან ორ წელიწადში კალამს ფასი დაახლოებით 1000 აშშ დოლარით გაეზარდა. წარმოიდგინეთ, ყოველდღიურად იყენებთ კალამს, იღებთ სიამოვნებას მისით და ამავე დროს ღირებულება მატულობს. დამეთანხმებით, რომ ნამდვილად მიმზიდველი სცენარია.
გაითვალისწინეთ, რომ გლობალური ინფლაციისა და წარმოების გაძვირების პარალელურად, ბრენდები რეგულარულ მოდელებსაც ყოველწლიურად დაახლოებით 5-10%-ით აძვირებენ. მაგალითისთვის, Aurora-ს რეგულარული მოდელი "Optima" 2000-იანებში 200–250 აშშ დოლარი ღირდა, დღეს კი 750–850 აშშ დოლარს აღწევს.
მთელი მსოფლიოს მასშტაბით ამ ყველაფერს კოლექციონერები უდიდესი ყურადღებით აკვირდებიან. მათი მიზანია შეამჩნიონ მოდელები, რომლებიც მათ მომავალში ფინანსურ სარგებელს მოუტანს. ეს არის პროცესი, რომელიც ცოდნას, დაკვირვებას და ცოტა იღბალსაც მოითხოვს.
კომპანია Montblanc 1992 წლიდან ყოველწლიურად უშვებს Writers Edition-ს. თითოეული გამოშვება დაახლოებით 16,000–20,000 ეგზემპლარია. თუმცა გასაკვირია, რომ ყველა მოდელის ფასი არ მატულობს და პირიქით, ზოგიერთის ღირებულება კლებულობს კიდეც. მაგალითად, "Louis Stevenson"-ის 2023 წლის მოდელი დღემდე სრულადაც კი არ გაყიდულა, მაშინ როცა Alexandre Dumas კალამმა ფასში 300%-იანი მატება აჩვენა.
რა არის საიდუმლოს გასაღები? - ცოდნა, დაკვირვება და სწორი დრო შესაძენად.
დღეს უკვე ბევრი კრიტერიუმი არსებობს, რომლებიც დაგვეხმარება გავიგოთ თუ რომელი მოდელია პოტენციურად სწორი ინვესტირება. მთავარი, როგორც წესი შეზღუდული ტირაჟია, რაც ნაკლები რაოდენობაა წარმოებული, მით მეტია ფასის მომატების შესაძლებლობა. თუმცა აქაც ინდივიდუალური შეფასება სჭირდება ამ ყველაფერს: Montblanc-ის 10,000-იანი ტირაჟი შეიძლება ისეთივე იშვიათად შეფასდეს, როგორც Sheaffer-ის ან Scrikss-ის 100-იანი, რადგან ბრენდის მასიურობა, მოთხოვნა და ბაზრის დინამიკა დიდ როლს თამაშობს.
ჩვენი აზრით, უახლესი და პერსპექტიული ინვესტირებადი მოდელი არის VISCONTI Homo Sapiens Full Demo - 2025 წლის სექტემბერში გამოშვებული უნიკალური ვერსია. ის რამდენიმე მიზეზის გამო გვაჩვენებს, რომ მომავალში ღირებულების ზრდის მაღალი პოტენციალი აქვს:
შეზღუდული გამოშვება — მხოლოდ 1088 ცალი.
პირველი სრულად გამჭვირვალე Homo Sapiens.
პირველად დამზადებული Skeleton-style წვერი, რომელიც სწორედ ამ მოდელში გამოიყენეს ასევე პირველად.
ამ კრიტერიუმებით, საკმაოდ რეალურია, რომ კალამმა მომდევნო 5 წელიწადში მინიმუმ 50%-ით მოიმატოს ფასი.
და ბოლოს, შესაძლოა დღეს იყიდოთ კალამი, რომელიც 50 წლის შემდეგ თქვენი შვილიშვილისთვის სახლს შეიძენს.
ეს ხომ კოლექციონერთა სამყაროს ყველაზე რომანტიკული მხარეა.